مع بداية تموز، شهر مار شربل،
هالقديس اللي وصل صيتو حتى أقاصي الأرض، ولمست أعاجيبو أعداد هائلة من البشر حول العالم،
مندعيكون، إخوتي، للتأمّل بهالكلمات الرائعة اللي قالن هالقديس العظيم، ونشالله نقدر نكون على مثالو ونطبّق هالأقوال بحياتنا اليوميّة:
“السلاح الأساسي الأوّل ضدّ الشيطان هو الصدق. كلّ كلمة صدق بتقولها هي سهم بترميه بقلب الشرّير،
وكلّ اعتراف صادق بالخطيّة هو رمح بتخرق فيه قلبو.”
“والسلاح الأساسي الثاني هو التواضع.
الصدق والتواضع يعني الاعتراف. اعترف بخطاياك، بتقتل الشرّ اللي فيك.”
“كلّ همّ الشيطان إنّو يلهيك عن الله. انتبه!
بيحاول يلهيك عن الله حتّى بأمور الله: بيلهيك عن معنى الكلمة اللي عم تصلّيها بالكلمة ذاتها،
بيلهيك عن تسبيح الربّ بلحن النشيد اللي بتسبّحو فيه،
بيلهيك عن الله بالصلا يللي عم بتصلّيلو ياها.”
“تذكّر منيح إنّو ما فيك توقف بوجه الشيطان إذا ما فيك تركع قدّام الله.
الشيطان ما بيجي من الشبابيك والطوق اللي سهران عليها ومسكّرن منيح.
الشيطان بيجي من الباب اللي فاتحو تا تستقبل منّو.”
(كلمات مار شربل)
شهر مبارك 🙏