الله وينه؟ الله مات؟
(هيك قال الفيلسوف نيتشه)
إخوتي، الله معكن…
كلماتي اليوم ملفوفة بوجع بشر… بوجع عم ينزرع بعقول ولادنا وقلوبن… عالم شغلتُه يسرق وجدان وإحساس وإيمان عيالنا ومجتمعاتنا…
أسئلة عم تدور بين ولادنا… تلعب بملاعب مصيرن وهويّتن الحقيقية: إنّن ولاد الله…
سامحوني اليوم… موضوعي مش تأمّل أو صلاة أو قصّة… حديثي اليوم هزّة ضمير لكل واحد منّا… كنيستنا وخدّامها… أهلنا وعيالنا… مدارسنا وجامعاتنا وتعاليمنا…
كلّنا مسؤولين عن وجع ولادنا…
اسمعوا ولادكن، وكونوا واعيين، وصغولن…
بيسألوني كتار من شبيبتنا اليوم…
«وينه الله؟»
«إذا جدّ موجود… ليش ما بينهي الظلم والحرب والشرّ والقتل والخطيئة؟… ما في الله!»
«وينه الله؟ ليش ما بيتدخّل بهالعالم اللي عم يغرق بالعتمة… ويخلّصنا؟… الله مش موجود!»
«وينه الله؟ يفرجينا حاله؟… الله كذبة، وما بقى تضحكوا علينا!»
«بيحكي عن حاله إنّه إله محبّة وسلام… والبغض والخوف عم ياكلنا… وينه؟ برهنولنا إنّه موجود!»
«بتقولوا وبتوعظوا عنه إنّه إله قوي… إله غلب الموت… وينه؟… الله مات… وما إله وجود!»
«خلقتولنا الله وقلتولنا إنّه موجود قبل الخلق… من الأزل للأبد… بس وينه؟… خلّيه يظهر لنسجد له!… خلص يا أبونا… بيكفي تستغلّوا عقولنا… الله مات!»
وأسئلة كتيرة ما بتخلص…
وينه الله؟
الله مات؟… إيه بيّي، إيه… مات! بتعرفوا ليش؟
لحقوني واسمعوني…
بيّي… سألتوا كيف مات؟
سألتوا حالكن مين قتله؟
دوّرتوا عالقاتل وشو أداة الجريمة؟
راجعتوا ذواتكن شو دوركن بموت الله؟
من أوّل الدني، الله خلق الكون وقال إنّه هالشي كتير منيح… (سفر التكوين).
وسلّم كل شي للإنسان، وقلّه: «وكّلتك على كل هالكون لتخدمه وتحميه».
بس لحظة!
دخلكن، الله ما غلط بهالكلمة… وقت قال سلّطتك عالكون؟
امشوا معي لنتعرّبش أنا وياكن على سطح الحياة، ونتفرّج على فيلم حياة بشريّتنا…
نقرا وصايا الإنسان لله…
- عطانا الحرّية… قدّمناله عصياننا.
- عطانا الطهارة… قدّمناله خطيئتنا.
- عطانا المعرفة… قدّمناله جهلنا.
- عطانا الإيمان… قدّمناله إجحافنا.
- عطانا السلام… ردّيناله خوفنا.
- عطانا الكرامة… قدّمناله ذلّنا وعارنا.
- عطانا القوّة والجرأة… قدّمناله ضعفنا وخجلنا.
- عطانا الحبّ والأمانة… قدّمناله حقدنا وخيانتنا.
- عطانا ابنه… قدّمناله الصليب.
- عطانا الحياة… قدّمنا لذاتنا الموت.
هودي هدايا الله لإلنا… وهودي بسببن عم نقتل الله…
هودي رسايل الله لإلنا… وهودي بسببن عم ننكر الله…
هودي وصايا الله لإلنا… وهودي بسببن مات الله…
هيدا الله… وهيدا نحنا…
وبتسألوني: الله وينه؟
