<
صرخة وجع…انا هون..
حسوا فيي..ما تنسوني انا منكم…صللولي ما تنبذوني…غصب عني صرت هيك..بدي حب…وإنحب..
بهالكلمات بيحكينا (المدمن)…وصرختو لي طالعا من جوا…اقسى وأقوى من وجع الإبرة والشمة….
صباح الحب والرحمة….
يا اخوتي تنهيدة صلاتي اليوم…صرخة وجع…صرخة لإنسان هوي هون.. ومنو هون…
التقيت مبارحة بالصدفة بصديق قديم….كنا بذات الصف…
كان مميز بيناتنا..متفوق..حنون…وضعو المادي فوق المنيح…
شافني عالطريق بتوب الكهنوت….ركض ارتمى بهالأرض وصرخ آخخخخخخخخ…
يا ابونا رحمني…قللو لربك يشفيني…انا بحبو….
وقفت مصدوم…ما بعرف شو إحكي….تجمعت الناس علينا متل العادة حشرية وفضول….وما حدا ركض حملو او تجرأ يقرب صوبو… وصرخ بوج الناس وبوجي: رحموني…انا هون…عم بموت…حدا يشفيني…..لي تركتوني؟؟؟؟مش ذنبي..
ذكرني بصرخة الرب يسوع ل بيو عالصليب: إلهي إلهي لماذا تركتني؟..
اخدتو وقعدنا عالرصيف ..يحكي.. يبكي وجعو بكاني….ايه وجعني يا ناس…
لي كان مبارحة فوق بأخلاقو وفكرو ومصرياتو….صار تحت.. بزبالة افكارو وفقرو وحاجتو…آآخ عليك يا زمن…
سألتو شو بك يا رفيقي كيف وصلت ل هون؟ قللي: يا بيي..الحب..ايه يا بونا .الحب…تناسني…ما خلوني حس في…قالولي خد مصاري عيش..بروم..سافر..نبسط…بس أيا بسط؟..
سألتو مين لما خلاك تحب: سكت لحظة وغصت دمعتو بعينو…(((أهلي))) يا محترم…ايه اهلي والعشرة السيئة….مصاري كتير….لبدي ياه موفرلي…كل شي عملتو…بس ليك وين صرت….
ضعت…غرقت بوسخ المخدرات..وقلة الاخلاق..سرقة..كذب..وسخ من كل الانواع…
اتطلعت بعيون اهلي بركي يحسوا فيي..بس ما تندهي ما في حدا…حطيت كيس المخدرات ع طاولة المطبخ ت قللن انا عم بتعطى…بس ما حدا منعني…..كنت قللن علموني الحب..خدوني كنيسة ت شوف الناس لي بيحبو؟..
كان الجواب: الله ما بطعميك خبز ولا سعادة…الكنيسة للضعاف والمعقدين…
زرعوا فيي الحقد ع الله..والضعاف..حطوللي براسي..انت الله بمصرياتك بتعمول المستحيل… تركتو يحكي وانا نسيت حالي عالرصيف..وبسمع حركة وارايي..بلتفت بلاقي شابين وصبية عم يبكو متلو…استغربت وسألتن شو بكن يا بيي؟ بتقللي البنت: يا ابونا صرخة وجع صديقك كانت صرختنا من فترة..كنا متلو مدمنين وضايعين..بس الكنيسة والرب يسوع خللونا نوعا ونوثق انو الخلاص والسعادة منو هوي وبس…
لتفت الصديق فين وقللن: خدوني لعندو بدي قللو انا هون..خللي يحبني متلكن..وسكتنا كلنا…
وراحوا..والضحكة بعيونو… وانا فليت…
يا اخوتي..ليش صرنا قاسيين هيك…المدمن والمدمنة ..هودي ولادنا…بقلب كل بيت من بيوتنا يمكن يكونو موجودين..ومنا عارفين..
.انتبهوا يا اهلنا ويا كنايسنا ويا مدارسنا وجامعاتنا….السم والموت صار جواتنا وعوا.. انتبهوا….
اذا انفقد الحب من قلوبنا…فقدنا حياتنا وفقدنا الله…رجعوا صللوا لولادنا..حسوا فين..رافقوهن…حبوهن…ما تخلو المادة تاكل مستقبلن…بدنا نتحاسب علين… هودي ولاد الله….
وصرختي لكل تجار هالموت….جاييكن نهار تموتوا بالسم لعم ترشوا بين ولادنا….وعوا في الله رح يحاسب…
يا رب حمي ولادنا واهلنا ومجتمعنا…
قصة الصديق ….هي قصة مجتمعنا المخدر بالمال والسلطة والشهوة…..احمينا يا رب…. والله معكن…
الاب بطرس عاقوري
]]>